KALIBO, Aklan—Naga-eutaw ag uwa eon it kabuhi ro sangka 78 anyos nga lolo sa suba nga sakop it Brgy. Panayakan sa banwa it Tangalan ko Disyembre 19 it hapon.
Nakilaea ro biktima nga si Emmanuel Gomez ag residente it nasambit nga lugar.
Suno kay PEMS Esmael Panganonong it Tangalan Municipal Police Station, haeos 10 metros eamang halin sa baeay it biktima ro suba kon sa siin raya naeumos.
Nagaistar ro biktima sa lugar nga meapit sa suba.
Nasayuran nga sambato sa mata it biktima hay totally blind samtang ro sa pihak hay madueom eon man.
Pahayag dugang ni PEMS Panganonong, ginapatihan nga nagpaligos sa nasambit nga suba ro biktima kon sa siin makapilang beses eon man raya sangkiri nga maeumos apang gilayon man nga nasasalbar.
Apang, ko Disyebre 19 hay owa eon raya mapan-uhan sa suba nga gintunaan it anang hinali nga kamatayon.
Kumbinsido man sigon ro onga it biktima nga uwa it foul play sa nasambit nga insidente.
