KALIBO, Aklan — Nagahimo it pangaean makaron sa Estados Unidos ro sangka Akeanon writer matapos nga gin-release ro anang libro nga pwedeng ma-enjoy it mga inunga.
Suno kay Mrs. Florenda Francisco, ina it author nga si Jennifer Francisco Viray, tumandok it Brgy. Andagao, Kalibo ag presenteng naga-trabaho sa Amerika nga ro anang children’s book nga may titulo nga “Loving Lola” hay gin-publish ag ginabaligya sa Amazon ag available man ag pwedeng mabasa sa sangka app.
Ginasugid nga ro characters sa anang libro hay inspired it anang lola.
Naging inspirasyon sigon kara sa pagsueat sa anang istorya hay ro pagpalangga it anang paboritong lola ag ro andang mga handumanan nga daywa.
Sa nasambit nga libro, gusto it author nga i-selebrar ro kaadlawan it anang lola sa anang kaugalingon nga espesyal nga pamaagi. Apang pirme imaw nga napas-eawan sa anang gustong matabu.
Ro leksyon sigon sa anang istorya hay bukon it importante kon paalin nga maipakita ro pagpalangga, basta nga raya hay halin sa tagipusuon.
Maskin sigon sanda nga mga ginikanan hay proud sa naging achievement it andang unga.
Sa anang mga bakanteng oras hay nagasueat raya it anang libro.
Si Jennifer suno kana hay nagbahoe ag nagtapos it pagtuon sa Amerika nga nagbo-oe it kursong Bachelor of Arts Major in English.
Nagtrabaho raya sa mga mabahoe nga kompaniya sa US ag makaron hay presenteng naga trabaho sa kompaniya nga gintukod ni Ryan Reynolds, sangka Canadian ag American actor, producer, ag businessman.
