KALIBO, Aklan—Padayun sa paghimo it pangaean ro sangka Aklanon matapos nga magkampeon sa kakatapos eamang nga Mayors Cup 9 Ball National Billiards Competition nga ginhiwat sa Sipocot, Camarines Sur ko Hunyo 23.
Ginpiyerdi ni Ronel Nalaunan ukon mas kilaea sa bansag nga “Toto Aklan” ro World Champion nga si Django Bustanmante pag-abot it finals.
Sa pag-istorya ni Ronel, nag-umpisa ro anang pagkahilig sa paghampang it billiards halin kat unga pa eamang imaw.
Maabu eon sigon ro anang mga ginpasakupan nga kompetisyon sa nagkaeain-eain nga rehiyon it nasyon.
Importante sigon nga makaangkon it “focus” sa paghampang agud nga indi ma-distract.
Makabulig man suno kana ro pag-angkon it mabahoe nga kumpiyansa sa kaugalingon agud nga maging madinaeag-on sa gina-intrahan nga kompetisyon.
Ginpabugae pa kara nga nahimo man nana nga piyerdihon ro legendary nga si Efren “Bata” Reyes ag maskin ro World rank No. 1 sa billiards.
Sa pihak it waea-tuo nga achievements, owa gihapon nagapundo si Nalaunan sa pagtao it inspirasyon eabi eon sa mga pamatan-on nga gustong makilaea sa andang abilidad.
Sa makaron, nagaprepara eon imaw sa nagahilapit nga kompetisyon kaibahan ro mga billiard player halin sa nagkaeain-eain nga parte it kalibutan nga pagahiwaton sa Metro Manila sa Hulyo 24.
