KALIBO, Aklan—Eubos ro kalipay ag pagpasaeamat it sangka Aklanon matapos nga magtapos bilang valedictorian it University of the Philippines (UP)-Visayas class of 2023 ko Hulyo 20.
Si Benreo Rex Rembulat nga nagtapos sa kursong Bachelor of Science in Applied Mathematics hay may General Weighted Average (GWA) nga 1.10975.
Suno kay Rembulat, matapos imaw nga makapasar sa entrance exam it unibersidad hay nagdesidir imaw nga bue-on raya nga kurso bangud paborito nana ro Mathematics.
Apang, owa sigon nana ginaeauman nga magapangibabaw imaw matapos nga makabuoe it pinakamataas nga GWA sa bilog nga eskwelahan.
Owa man sigon naging madali ro anang eksperyensya sa pagtuon bangud sa kakueangan it financial.
Si Rembulat nga sangka DOST scholar hay nagtapos man nga Summa Cum Laude.
Imaw hay nag-graduate it elementarya sa Andagao Elementary School bilang valedictorian ag nag-high school sa Regional Science High School bilang valedictorian man.
