KALIBO, Aklan– ”Bukon it raya ro akon nga 1st choice nga kurso”.
Raya ro ginpahayag ni Nicole Segovia nga nagtapos bilang Magna Cum Laude sa kursong Bachelor of Science in Elementary Education ukon BEED sa ASU Ibajay campus ag ro naga isaeahanon nga Aklanon nga naging IWAG Awardee sa Western Visayas.
Suno kay Segovia nga ro anang handom nga kurso sa kolehiyo hay rong Bachelor of Science in Psychology apang bangud sa kakapusan pinansyal hay owa eon nana raya hapadayon kasunod man it owa it makarondaya nga kurso sa probinsya it Aklan.
Ginpahayag kara nga ro panyempo it pagpaeanasa it COVID-19 pandemic rong sambilog sa nagpabudlay sa anang pagtuon, physically ag mentally.
Naka-eksperyensya sigon imaw it kakaiba nga kasubo kun sa siin nagatieinangis imaw kada gabie sa owa nasayuran nga rason.
Apang tanan sigon it anang haagyan hay naeumpawasan nana pamaagi man sa pagpangamuyo ag paghalubilo virtually.
Paathag pa nana nga siguraduhon eamang nga napapalibutan ka it mga tawo nga makabig mo nga support system para maskin paalin hay makapaugan man sa ginapangatubang nga kalisod eabi eon samtang nagatuon.
Angot kara si Segovia hay sangka skolar maghalin sa Aklan State University – Ibajay Campus ag sangka Editor-in-Chief it The Panicle, ro official publication it nasambit nga unibersidad.
Samtang ro IWAG Award hay sangka kadungganan nga gina-organisa it Philippine Information Agency (PIA) Region VI para kilaean-on ro mga campus paper writers sa Senior High School ag kolehiyo.
Padumdum ni Segovia sa tanan eabi eon gid sa mga pamatan-on nga indi magpadaea-daea sa emosyon nga nababatyagan sa baylo hay isipon it mayad kun raya baea hay magatao it benepisyo sa imong kaugalingon ukon kun paanu raya makabulig kimo bilang sangka indibidwal.
Sa pihak nga parte, si Segovia hay nagtapos man bilang Top 3 sa 10 outstanding students it ASU Ibajay campus ag naboue man ro pagpasidungog bilang best research kamana man bilang best presentor.
