Kalibo Aklan————-Uman nga nagtao it inspirasyon ro sangka daeaga sa anang pamilya matapos nga mag Top 3 nationwide sa kakatapos eamang nga Midwife Licensure Examination.
Ro nasambitan nga daeaga hay ginkilaea kay Marie Joy Christel Nacor tubong banwa it Madalag ag nagtapos it kursong midwifery sa Iloilo Doctors’ College.
Nakabo-oe raya it 89.05 percent sa nasambitan nga eksaminasyon nga imaw man ro naging yabi agud nga maangkon kara ro ika-tatlong puwesto.
Samtang sa interbyu it Bombo Radyo, ginpahayag ni Nacor nga eubos ro anang kalipay ag indi sa gihapon makapati nga nakapasar imaw sa nasambitan nga eksaminasyon ag nakaibahan sa mga nag-top.
Samtang eubos man sigon ro anang pagpasaeamat bangud nga apisar nga daywang beses eun nga nasuspendi ro andang exam hay blessing man nga mas naging preparado sanda.
Mabahoe man sigon nga challenge para kana ro permi nga pagpueaw bangud mas nakakapag- review eamang imaw it maayos sa gabi-e.
Nasayuran nga si Nacor hay sangka student scholar it Department of Health (DOH).
Sa makarun hay prayoridad na sigon nga makapagtapos anay sa anang pagtuon sa kursong midwifery ag hueaton man ro magiging assignment it DOH para kana kun sa siin nga lugar imaw magapanerbisyo.
