KALIBO, Aklan—Uman nga nagtao it bugae para sa probinsya it Aklan ro sangka daeaga matapos nga magtop-7 sa kakatapos eamang nga Dentistry Licensure Examination.
Sa interbyu it Bombo Radyo, ginpahayag ni Dr. Mary Diane A. Garcia nga tuman ro anang kalipay nga nabatyagan matapos nga makasueod sa Top 10 sa nasambitan nga eksaminasyon.
Owa sigon nana gina-ekspektar nga sambilog imaw sa mga magapangibabaw bangud ro anang ginahandum eamang hay makapasar sa anang ginpili nga profession.
Sa pihak kara makabig man sigon nana nga reward para sa anang paghimakas ro anang naabot makarun.
Malipayon man sigon imaw nga makatao it bugae sa anang mga pamilya nga una sa tanan nga oras agud nga magpaabot it suporta.
Sa makarun hay ginahueat eun lang sigon nana ro andang pagpanumpa ag plano karang maghatod it anang serbisyo sa anang mga kasimanwa sa Aklan.
Madumduman nga ko nagtaliwan nga dominggo eamang kat gin-anunsiyo it Professional Regulation Commission (PRC) nga may unang 731 sa kabuligang 1,660 ro nakapasar sa January 2022 Dentist Licensure Examination nga gintao it Board of Dentistry sa Manila, Baguio, Cebu, Davao ag Iloilo.
