KALIBO, Aklan—Nagviral makaron sa social media ro sangka Aklanon matapos nga magpost it anang litrato kun sa siin nakasuksok raya it puti nga eambong nga may naka-imprintang vaccination card ag vaccination certificate.
Suno sa nagviral nga si Mr. Silver Cordero nga bilang sangka online seller hay nalisdan imaw nga magbilinukad it anang mga papeles mas kapin kung magdeliver it mga order it anang costumer.
Matapos nga nagpatuman ro pilang ka mga establisyemento it ‘ no vax, no entry policy’ naisipan sigon nana nga ipa-print ro anang vaccination card agud nga indi eun malisdan sa anang mga paeanawon.
Bangud sa kakaibang gimik hay naghakot it maabong komento ro nasambitang post sa social media.
Sa pihak kara , nalipay sigon si Cordero nga nakatao imaw it good vibes sa ibang tawo sa pihak it ginapangatubang nga pandemya.
Dugang pa kara nga nalipay man imaw ag ginabatun man it anang mga ginasudlan nga establisiyemento ro anang vaccination card nga naka print sa anang puting eambong.
