KALIBO, Aklan–Arestado ro sangka 24-anyos nga Sangguniang Kabataan (SK) kagawad kasunod it ginpatigayun nga drug buy bust operation it mga kapulisan sa bahin it Brgy. Mabilo, Kalibo makaron nga gabi-i.
Nakilaea ro suspek nga si Renz Lloyd Rasgo, sangka aktibong SK kagawad it Brgy. Dongon West, Numancia.
Si Rasgo hay madinaeag-on nga naaresto pinaagi sa gintingub nga pwersa it Provincial Drug Enforcement Unit (PDEU)-Aklan, Philippine Drug Enforcement Agency (PDEA) ag Kalibo Municipal Police Station.
Suno kay Police Lieutenant Colonel Frenzy Andrade, Head it PDEU-Aklan nga mabuhay eon nanda nga ginasubaybayan ro suspek ag ro iba pa kara nga kaibahan nga eakot sa iligal nga droga.
Makabig sigon nga high value individual si Rasgo bangud empleyado raya it gobyerno.
Narekober sa posisyon ag kontrol it suspek ro sangka mabahoe nga sachet it shabu kabaylo it P15,000 nga marked money.
Si Rasgo hay temporaryong igakulong sa lockup cell it Kalibo Municipal Police Station para sa nagakaigo nga disposisyon.
Samtang, nag-apela man si Andrade sa mga ginikanan nga regular nga i-monitor ro aktibidad it andang mga unga para magiyahan ro mga raya ag mapaeayo sa iligal nga droga.
Sa pihak nga parte, maidid nga ginpamalibaran it suspek nga nagaduso imaw it iligal nga droga.
Pagdepensa it suspek nga ginpaeapitan imaw it daywang ka mga persona ag gindawat kana ro item kaibahan ro kwarta.
