KALIBO, Aklan—Makarun nga bisperas it pista minatay, uman nga ginbuhi it sangka albolaryo nga si Raffy Nahil ag tumandok it banwa it Madalag ro istorya angot sa mga kaeag.
Raya hay pamaagi sa pakikipagbahin it istorya it 16 anyos nga babayi nga ginapahayag nga ginsapian.
Bangud nga imaw hay kilaea eun nga manugbueong sa andang lugar, gintawag sigon imaw it pamilya it nasambitan nga babayi agud nga magpangayo it bulig.
Pag-abot sa mismong panimaeay hay anang gin-orasyunan ro dalagita ag gilayon man nga natapna ro indi maeksplekar nga ginabatyag kara.
Pagkataliwan it daywang adlaw, uman nga nagwala ro dalagita ag indi eun mapuko it anang mga miyembro it pamilya.
Bangud kara hay ana rayang uman nga ginbalikan ag dikato hay anang gin-usisa ro kahimtangan kara.
Sa anang pagpamantaw, hay bukon sigon it maeain nga elemento ro nagsapi kara, kundi nga ginsueod it ginapatihan nga kaeag.
Ro nasambitan nga kaeag hay ro mismong igmanghod it dalagita nga namatay may 20 anyos eun ro nagtaliwan nga ko dato nga tiyempo hay waeong dag-on pa eamang raya.
Kasunod kara, anang gin-istorya ro kaeag nga nagsanib sa dalagita ag ginpabay-an nga makahambae it anang gustong ipaabot sa anang pamilya.
Kato man kat madiskubrehan nga gusto eamang it kaeag nga dumdumon it anang pamilya bangud aminado man ro mga raya nga owa eun nanda nabisitahan sa sueod it 20 anyos.
Naghinyo pa sigon ro kaeag nga kunta hay maisaylo ro anang toe-an agud nga mapaeapit sa anang pamilya.
Pagkatapos nga masunod ro kagustuhan it kaeag hay nagguwa man sigon raya sa eawas it dalagita ag nagbalik man raya sa normal sa bulig eun man it mga orasyon it albolaryo.
Mga Ka-Bombo, nagkaeain eain man ro atung pamaagi sa pagselebrar it pista minatay apang ro pinaka-importante hay indi kita magkalipat nga ipangamuyo ro atung mga mahae sa kabuhi nga nagtaliwan eun para sa andang kaeuwasan.
