KALIBO, Aklan–Naging emosyunal ro sangka ama sa anang panawagan sa Bombo Radyo Kalibo sa pagkaduea it anang unga nga babaye kaibahan ro tatlong iba pang kaklase.
Suno kay Jude Seragon Adiaton, ama it 20-anyos nga si Rica Jane Amosong nga ko pebrero 16 ulihi nga nakita ro ap-at nga nagsueod sa sangka convenient store sa banwa it makato ag makataliwan ro tatlong minutos hay nagguwa ag nagsakay sa sambilog pang motorsiklo paagto sa western side it probinsiya.
Bangud nga owa nagasabat sa anang mga tawag, text messages ag chat rason nga haeos 48 oras eon imaw nga owa it matino nga tueog ag indi makakaon sa pagkabaeaka.\
Maskin sigon ro andang manugturo sa Aklan State University ukon ASU-Makato hay nagtinguha nga mausoy sanda, apang ginsabat nanda nga confidential makaron ro andang lokasyon.
Samtang, nagapati si Adiaton nga posibleng ro pagkaduea it anang unga ag mga kaklase hay bangud sa gina-alegar nga pag-recruit kanda it grupo ukon fraternity.
Kaibahan sa missing person hay sanday Kathlyn Khay Revicente, 18 anyos; Avie Rose Irac, 18 anyos ag Andemer Tambong, 18 anyos it Brgy. San Dimas, Malinao.
Ginahinyu it andang pamilya nga kon may impormasyon sa ginakahimtangan it nasambit nga mga estudyante hay makipag-angot lkanda ukon sa pinakamaeapit nga police station.
Gina-imbestigahan eon it kapulisan ro nasambit nga insidente partikular kon sin-o ro sa likod it pagkaduea it nasambit nga mga estudyante.
