KALIBO, Aklan – Imbis nga manami nga bakasyon hay nauli sa trahedya ro natabo kun siin patay ro sangka American national bangud sa pagka-eumos nga natabo sa frontbeach sa Brgy. Manocmanoc sa Isla it Boracay ku Hulyo 14.
Pahayag ni PLT Romoe B. Sabrine PCP 1 Commander it Malay PNP nga acute respiratory failure secondary to drowning ro naging rason ku hinali nga kamatayon it eaeaki.
Ginkilaea ro biktima nga si Christopher Perony, 36-anyos ag residente it Michigan, USA. Ku una, eaom sigon nanda hay nagahangae eamang ro eaeaki hasta sa raya hay unang ginrespondehan eun it mga bystanders.
Gintinguhaan pa sigon nga irevive ro biktima antes gindaea sa ospital apang uwa eun raya naeuwas pa. Pahayag ni Sabrine nga indi haeos maistorya ro asawa it biktima bangud nga emosyonal raya sa makaron.
Ro bangkay sigon it Americano hay gincremate sa banwa it Numancia ag gindaea pauli kabei sa andang nasyon. Kumbinsido man ro asawa it eaeaki nga uwa it foul play nga natabo.
