KALIBO, Aklan—Nagapadayun ro imbestigasyon it kapulisan sa pagbuno-patay sa sangka an-um nga dag-on nga ungang eaeaki it anang kaugalingon nga ama sa sueod it anang kwarto sa andang baeay sa Barangay Bubog, Numancia kaina it agahon.
Nasayuran nga matapos nga mahimo ro krimen hay naglaslas it anang tiyan ro suspek.
Ro suspek nga owa anay ginpangaeanan base sa hinyu it anang pamilya hay nagapang-edaron it 30-anyos ag nagatrabaho sa sangka pribadong kompaniya sa banwa it Kalibo.
Suno kay barangay kagawad Mark Anthony Leyson, pagresponde nanda sa baeay it suspek, gulpi raya nga nagguwa sa anang kwarto nga duguan ag ginpilak ro daea nga kutsilyo.
Gin-aku man kara nga pinatay nana ro anang unga.
Ginasugid nga ginhueam eamang it suspek ro unga sa poder it anang lolo ag lola sa Barangay Laguinbanua East, Numancia.
Sa inisyal nga imbestigasyon, posibleng nakaangkon it depression ro ama matapos nga makaangkon sanda it owa pagka-ilintindihan it misis nga sangka police officer nga imaw ro nanay it unga.
Narekober halin sa crime scene ro kutsilyo ag sangka eubid nga ginadudahan nga pagagamiton kunta kara sa hana nga pagbigti.
Sa makaron hay padayun nga ginabueong ro suspek sa sangka pribadong ospital.
