KALIBO, Aklan—Daywang ka baril ag bulto it mga bala ro nakumpiska it mga tawuhan it New Washington Municipal Police Station ag Criminal Investigation and Detection Group ukon CIDG sa ginkasa nga operasyon sa sueod it baeay it sangka army reservist sa Sitio Bugasongan, Brgy. Guinbaliwan sa banwa it New Washington.
Pasado alas-8:00 it agahon kat salakayon it mga otoridad ro baeay it suspek nga si John Arboleda, 45 anyos ag residente it nasambit nga lugar.
Armado ro mga pulis it search warrant nga gin-isyu ni Vice Executive Judge Montalid Patnubay Jr., it RTC, Branch 9, Kalibo, Aklan rason nga nasueod ro target nga baeay ag naaresto ro suspek.
Dikara nadiskubre it mga operatiba ro sangka unit it kalibre .45 nga pistola; limang bilog nga magazine assembly para sa .45 kalibre nga baril; 55 nga bala it kalibre .45; sambilog nga inside holster para sa 45 kalibre nga baril; sangka unit it delinger revolver black widow ag ap-at nga bala it 9mm caliber.
Madumduman nga ko 2018 hay nadakpan man si Arboleda sa Barangay Andagao, Kalibo matapos nga mag baligya it .45 kalibre nga baril sa balor nga P18,000.
Mabuhay eon man sigon raya nga ginatutukan it mga otoridad bangud sa anang gun running operation ag paghupot it armas nga owa it nagakaigo nga dokumento.
Ginpahayag dugang nga may pilang reklamo man kontra kay Arboleda angot sa gina alegar nga pagpinaeupok kara it baril sa nasambit nga lugar.
Nagapadayun man sigon ro “Oplan Katok” kontra sa mga gun owners nga may expired nga mga lisensya it baril.
Ro suspek hay magapangatubang sa kasong pag-eabag sa RA 10591 ukon Comprehensive Firearms and Ammunition Regulation Act of 2013.
