KALIBO, Aklan–Maswerteng naka-euwas ro parehong driver, pahinante ag mga sakay nga pasahero matapos ro nag-eontad nga aksidente sa tunga it bus ag deliver van, kaina it hapon sa diversion nga sakop it banwa it Lezo.
Base sa inisyal nga imbestigasyon, halin sa bahin it Parañaque ko Biyernes it gabi-i ro delivery van nga nakataeana kunta nga magdeliver it hotel supplies sa Cebu samtang ro ceres bus hay magapaadto kunta sa Metro Manila.
Ginasugid nga nag-overtake ro delivery van apang naaeang-aeangan rason nga nagpang abot sanda it bus.
Suno kay Vicente Rabao, pahinante it deliver van nga indi eon nanda haeos madumduman ro mga natabo bangud sa kadasig it insidente.
Ro parehong driver hay gindaea sa Lezo Municipal Police Station para sa nagakaigo nga pagpangusisa.
Samtang, ro mga pasahero it bus hay gin-transfer anay sa ibang behikulo.
