KALIBO, Aklan—Positibo nga ginkilaea it anang pamilya ro nasapwan nga nagakaagnas eon nga bangkay it sangka babaye sa sapa bandang alas-9:00 kaina it agahon sa Sitio Mangga, Brgy. Torralba, Banga.
Raya ro ginkumpirma ni Jimmy Invina, tiyo it biktima nga naging emosyunal sa pagkakita sa anang gumankon.
Suno kana nga pag abot nana sa lugar hay nakilaea eagi nana ro anang gumankon nga si Roselle Ann Invina-Rodriquez, 19 anyos, may unga, apang separado sa anang live-in partner.
Sambilog sa naging palatandaan nana sa identity it anang gumankon hay ro anang polseras sa siki.
Ginasugid nga ko adlaw it Huwebes it gabi-i ulihing nakita nga buhi ro biktima sa sangka namatyan.
Apang owa nanda raya gin-usoy bangud nga sanay sanda sa anang batasan nga paeawarang.
Nasayuran nga ro lugar nga nasapwan it bangkay hay maeayo sa mga panimaeay.
Plano man it pamilya nga ipa-autopsy ro bangkay agud nga matumod ro rason it anang kamatayon.
Nauna eon nga nakita ro eawas ni Rodriquez it sangka residente nga si Josie Inosanto nga nagapanuea-on it pako.
Suno kana nga samtang nagapaeapit sa lugar hay nakahugum imaw it mabaho nga hugum hasta nga nakita kara ro nagakaagnas eon nga bangkay sa sapa nga nagakaya.
Ro anang blouse hay bulaklakin ag naka-shorts.
Sa makaron hay nagapadayun ro imbestigasyon it Banga PNP sa insidente.
