KALIBO, Aklan–Ginkumpirma it Aklan Police Provincial Office (APPO) ro natabo nga engkwentro sa tunga it 12 Infantry Battalion sa idaeom it operational control it 301st Infantry (BAYANIHAN) Brigade ag New People’s Army (NPA) nga ginkamatay it sangka babaye nga miyembro it makawaeang grupo.
Suno kay Police Major Willian Aguirre it APPO nga natabo ro engkwentro bandang ala-1:40 it hapon ko Abril 1 samtang nagapatigayun it pagpatrolya ro tropa it gobyerno sa bahin it Sitio Maytaraw, Brgy. Dalagsaan, Libacao.
Nagbuhay suno kana it haeos 15 minutos ro bakbakan.
Sa mayad nga swerte hay owa it nailistang ninahan sa bahin it militar samtang sambilog ro kumpirmadong patay halin sa limang miyembro it nakasagupa nanda nga NPA.
Narekober sigon sa posisyon it napatay nga rebelde ro sangka homemade shotgun, sangka hand grenade, sangka backpack ag pilang personal nga kagamitan.
Matapos ro insidente hay nagplastar it pilang ka mga checkpoint ro mga otoridad sa banwa it Libacao ag bahin it Brgy. Tapaz, Capiz sa pagpanguna it 1st Aklan Police Mobile Force Company (PMFC).
