KALIBO, Aklan—Magapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002 ro sangka 50-anyos nga babaye matapos nga uman nga madakpan sa drug buy-bust operation nga ginkasa it Provincial Drugs Enforcement Unit ukon PDEU Aklan sa Sampaguita St. Brgy. Andagao sa banwa it Kalibo.
Ginkilaea ni P/Major. Frenzy Andrade, head it PDEU Aklan ro suspek nga si Layden Desbaro ag residente it nasambit nga lugar kon sa siin naboe-an imaw it daywang ka sachet it suspected shabu kabaylo it buy-bust money nga kapin sa P4,000 pesos.
Sa paghaeoghog it mga awtoridad sa anang mga kagamitan sa sueod it anang apartment nga temporaryong ginadayunan hay nakarekober dugang it 17 ka mga suspected shabu nga may street value nga kapin sa P38,000 pesos.
Suno pa kay P/Major Andrade nga nauna eon nga nakulong ro suspek kaibahan ro anang asawa bangud man sa illegal nga droga apang temporaryong nakahilway bangud nga nakaavail it plea bargaining.
Angot kara, uman nga nagpadumdom ro awtoridad sa tanan nga mga nakahilway ag uman nga nagaduso it illegal nga droga nga padayon nanda ro mga raya nga pagatugison agud nga maibalik sa kulungan bangud sa nagasamad sanda it pagpangabuhi it kada pamilya.
