KALIBO, Aklan–Nagdangop sa Bombo Radyo Kalibo si Ronald Dela Rosa para ipaabot ro andang reklamo kontra sa anang tiyo nga owa nagsunod sa kasugtanan.
Raya hay may kaangtanan sa mabaho nga hugom it baboyan it anang tiyo nga si Fulgencio Dela Rosa, residente it Brgy. Pook, Kalibo.
Suno kay Ronald, una eon sanda nga nagpaabot it concern sa barangay kung siin nakaangkon sanda it settlement.
Gintaw-an sigon ro anang tiyo it hasta Abril 30 para i-dispose ro anang mga alagang baboy apang owa raya nagsunod sa kasugtanan.
Sa kamatuoran suno kana hay nagpatigayun it pagbisita sa lugar ko nagtaliwan nga adlaw ro pilang kagawad ag dikara natukiban nga owa gihapon nabuoe ro mga baboy.
Sambilog pa sa eubos nga ginkadismaya it tagreklamo hay ro pagbuhi it mga maeain nga tinaga it anang tiyo kontra sa anang ina.
Masyado sigon nga masakit ag bukon it manami pamatian ro mga ginbuhian kara nga tinaga rason nga pursigido sanda nga ipadayun ro reklamo.
May kaangtanan kara, nag-apela man si Kagawad Nolan Sarabia it Brgy. Pook, Kalibo sa ginareklamo nga si Fulgencio nga magsunod sa andang nakasugtanan sa barangay.
Raya hay para matuldukan eon ro isyu ag indi eon mag-abot pa sa pagpasaka it kaso.
Ginapahayag nga gin-akusahan sanda ni Fulgencio nga bias sa pagtratar sa mga reklamo nga ginapaabot sa andang barangay butang nga hugut man nga ginpamalibaran ni kagawad Sarabia.
Suno kana, gina-ubra eamang nanda ro andang obligasyon para mapabilin ro kaayusan sa andang nasakupan.
