REGIONAL News — Bangud sa indi matapos-tapos nga banggi-anay, owa eon nakapugong pa ro sangka barangay kagawad ag nagbo-oe it boxing gloves ag ginpa-boksing ro 15-anyos nga miyembro it LGBT community ag kaaway kara nga 14-anyos nga dalagita sa banwa it Molo sa Iloilo City.
Ginpatawag it Department of Social Welfare and Development (DSWD) si Barangay West Habog-Habog, Molo Kagawad Lenny Engada ag ro daywang menor de edad para ayuson ro nasambit nga gulo.
Sa pahayag ni Engada nga imaw ro chairman it peace and order sa andang lugar, daywang buean eon ro away it daywa nga ginkilaea sa mga alyas nga Kilay ag Kiray.
Nag-abot sigon sa punto nga mas pa nga nag-init ro banggi-anay it daywa hasta nga gintawag eon imaw it tiya it dalagita para magpatunga sa andang away.
Gin-atubang sigon nana ro daywa agud nga tapuson eon ro andang away apang mas pa nga nagka-initan ro dalagita ag si Kilay ag gustong magbaeaywan.
Naubos ro pasensya ni Engada ag ginpasugtan kara ro gustong matabu it daywa rason nga nagbo-oe it daywang boxing gloves ag ginpaboksing ro mga raya.
Owa man it naninahan sa mga raya bangud nga insigida man nga napara it andang mga igbata.
Nasayuran nga parehong owa it mga ginikanan ro daywang menor de edad nga makaron hay nagapaidaeum sa rehabilitation counseling agud nga malikawan ro dugang nga banggi-anay.
Aminado man si Engada nga saea ro anang gin-obra ag posible raya nga igapatawag it mataas nga opisyal it lokal nga gobyerno ag pagapasabton.
