KALIBO, Aklan—Ginkuwestiyon it sangka barangay kagawad ro pagkontra it militanteng grupo sa ginahimo nga covid response it gobyerno.
Ginbatikos ni Barangay kagawad Maximo Lauz it Camaligan, Batan ro naging pahayag ni Bagong Alyansang Makabayan ukon Bayan-Aklan Provincial Coordinator Kim Sin Tugna nga palpak ro pagsabat it gobyerno sa ginapangatubang nga pandemya partikular sa andang vaccinatior roll-out.
Suno kana nga ginahimo man it administrasyong duterte ro tanan agud nga mataw-an it nagakaigo nga proteksyon ro mga pumueuyu.
Ro kinahangean suno kana makaron hay ro pagbueuligan it tanan agud nga madinaeag-on nga masuk-ean ro deadly virus.
Sakit eon sigon it mga pumueuyu ro “last minute syndrome” ag “mañana habit” ukon ulihi eon nga nagahueag rason nga nagadueutdutan sa vaccination site.
Madumduman nga umpisa nga nagpaguwa it direktiba si pangueong duterte nga “no vax , no labas” ag “no vaccine, no entry” sa mga pampubliko ag pribadong taeatapan ag iba pang mga establisimento komersiyal hay imaw pa eamang nagdesisyon nga magpabakuna kontra covid 19.
Sa pihak nga parte, gindugang pa ni kagawad Lauz nga nagapadayun ro andang bakunahan sa andang barangay.
Kadungan kara, nagapatigayon eon sigon sanda it mapping agud nga matumod ag mailista ro mga pumueuyu sa andang lugar nga owa pa nabakunahan ukon nagapamalibad nga magpabakuna.
Raya hay bilang sabat sa direktiba it department of the interior and local government ukon DILG.
