KALIBO, Aklan—Nagaeaum ro kilaea ag batikang abogado sa Aklan nga kabay nga indi makalipatan it mga Pilipino ro leksyon nga ginpakigsukoe sa EDSA People Power Revolution may 36 anyos eon ro nagtaliwan sa selebrasyon kara sa Biyernes, Pebrero 25.
Suno kay Atty. Plaridel Morania nga madaling makalipat ro mga Pinoy, kun sa siin sangka halimbawa kara ro natabu ko EDSA revolution ko 1986 nga nagpatalsik sa diktador nga si Ferdinand Marcos.
Kauna-unahan sa kasaysayan suno kana ro natabu nga malinong nga rebolusyon nga nagatuyo nga pahalinon ro owa eon nailaan nga lider it nasyon.
Makaron nga nagahilapit eon man ro eleksyon, dapat nga ro ibutang sa pwesto hay ro may bastanteng ikasarang, mayad magdumaea ag bukon it manakaw, owa nagapromisa , owa gina-una ro kaugalingon nga kamaeayran ag eabaw may pag-ulikid sa isigkatawo ag manami ro family background.
Maabu sigon ro nagakasaea sa pagboto ag kabay nga indi eon mauman.
Gindugang pa ni Atty. Morania nga ro bunga it nasambit nga rebolusyon nga makaangkon it mas manami nga puturo para sa mga Pilipino hay kabay nga mataw-an it katumanan sa masunod nga administrasyon.
Samtang, pila pa suno kana sa mga gin-aywan nga leksyon it EDSA hay ro paghili-usa it mga Pilipino sa pagsakdag sa mayad nga pagbinatasan kaibahan ro pagpalangga sa Diyos, pumueuyu, sa nasyon ag sa palibot kamana man ro tingob nga pagpaumwad sa nasyon.
