KALIBO, Aklan—Pabor si Atty. Plaridel Morania, sangka batikang abogado sa Aklan sa proposisyon nga obrahon nga sangka heinous crime ro vote buying.
Apang masyado suno kana nga mabug-at ro penalidad nga gustong ipapanaog sa mga mapamatud-an nga eakot sa pagpamakae it boto.
Nasayuran nga sa proposisyon nga ginaduso sa Kamara, gusto ni Malasakit ag Bayanihan Representative Anthony Golez, Jr. nga papanaugan it 20 hasta 40 anyos nga pagka-kulong ro maga-eabag.
Mag-eowas kara, may multa man raya nga indi magnaba sa 5 milyong piso ag hasta nagakabuhi nga diskwalipikasyon sa pagbuyot it posisyon sa gobyerno.
Samtang para man sa mga mapamatud-an nga nagabaligya it boto hay pagka-presu nga sang dag-on hasta an-um nga dag-on ag multang indi maganaba sa P100,000.
Bangud nga nagasamad sigon ro vote buying sa electoral process it nasyon pabor imaw nga makulong ro mga maeakot kara.
Samtang, nagapati si Atty. Morania nga masyadong mapintas ro penalidad nga gustong ipatong sa mga eakot sa vote buying.
Mag-eowas kara, matsa owa man sigon nagabagay nga ikonsiderang heinous crime ukon makangieidlis nga krimen ro pagpamakae ag pagbaligya it boto.
Sa makaron sigon ro vote buying hay ginakabig nga sangka election offense nga may penalidad nga pagkapresu nga sang dag-on hatsa an-um nga dag-on ag diskwalipikasyon sa pagbuyot sa anuman nga posisyon sa gobyerno.
