KALIBO, Aklan–Hugut nga naga-oponer si Aklan 2nd District Board member Jupiter Gallenero sa House bill 1085 ukon uman nga pag-file it Boracay Island Development Authority (BIDA) bill sa kongreso.
Makaeueu-oy sigon ro lokal nga gobyerno it Malay ag probinsya it Aklan engkaso nga madayun ro pagpasa it nasambit nga hagna bangud nga mapaidaeom eon ro isla sa Government Owned and Controlled Corporations (GOCC).
Suno kana, ro mga taxes, fees ag iba pang kita halin sa Boracay hay pagakolektahon it national government sa oras nga maipasa ro BIDA bill.
Buot hambaeon kara, mawad-an it kinamatarong ro LGU ag gobyerno provincial kung siin mabahoe ro epekto kara sa income it probinsya.
Ro mabilin eamang sigon sa LGU hay ro koleksyon sa real property tax.
Angot kara, naghimo eon sigon it sangka resolution si Vice Governor Reynaldo Quimpo bilang pagkontra sa BIDA bill kung siin nakataeana nanda raya nga pagatalakayon sa andang session sa adlaw it Lunes.
Sa Agosto 3 nakataeana man sanda nga makipagpueong sa pilang opisyal ag stakeholder sa Boracay para talakayon ro nasambit nga isyu.
