KALIBO, Aklan—Totally burned ro sangka boarding house nga ginapanag-iyahan ni Florencio Teodosio, 77-anyos, residente it Brgy. Andagao, Kalibo matapos nga masunog bandang alas 11:35 kabi-i.
Base sa inisyal nga imbestigasyon, human sa light materials ro nasambitang boarding house nga may ap-at ka mga kwarto kung sa siin daywa kara ro presenteng gina-rentahan.
Nag-umpisa ro kaeayo sa kwarto nga gina-ukopahan it mag-asawang Hector Arboleda ag Josie Arboleda.
Nasayuran nga owa sa boarding house ro mag-asawa kat matabo ro sunog bangud presenteng sa Manila ro mga raya.
Samtang, antes nag-umpisa ro sunog, may nahumgan sigon nga matsa may naga-kasunog si Niña Joy Roxas, 25-anyos, sambilog sa naga-renta sa nasambitang boarding house.
Owa eagi sigon kara gintaw-an it igtueopangod ro anang nahumgan apang matapos ro pilang minuto nga pagpamatyag hay nakita eon lang nanda nga naga-kasunog eon ro nasambitang kwarto it mag-asawang Arboleda hasta sa naugdaw ro bilog nga boarding house.
Ginkabuligan pa nga tapnaon it mga residente sa lugar ro sunog apang madasig nga nag-eapta ro kaeayo.
Sa pag-abot it mga katapo it Bureau of Fire Protection (BFP) ag Kalibo PNP hay nagaka-ugdaw eon ro edipisyo.
