KALIBO, Aklan—Ginaboeobanta nga nagaabot sa P700,000 pesos ro gin-aywan nga kahalitan sa sunog nga umugdaw sa bodega it sangka baeay kaina it agahon sa Brgy. Bubog, Numancia.
Suno kay FO1 Adrianne Villas, imbestigador it Bureau of Fire Protection ukon BFP-Numancia nga samtang nagatan-aw it TV, nakabati si Peter Lao it eupok ag sa anang pagguwa hay nakita kara nga nagakasunog ro bodega nga anang ginapanag iyahan nga may sueod nga mga construction supplies sa indi pa matumod nga dahilan.
Insigida imaw nga nagpangayo it bulig sa BFP-Numancia matapos nana nga mapan-uhan ro insidente.
Ginpahayag ni FO1 Villas nga ulihi eon sigon sanda nga nakaresponde bangud sa atrasado nga pag-report sa andang taeatapan.
Ginasugid nga nag umpisa ro kaeayo sa kisame.
Sa makaron hay nagapadayun ro andang imbestigasyon sa gintunaan it sunog.
Sa pihak nga parte, ginpahayag ni Peter Lao, madasig nga nagkalhit ro kaeayo sa sueod rason para maabu ro tanan nga gamit nga naka-tambak.
Sa mayad nga swerte, owa it ibang nadaeahig ukon nahalitan sa sunog.
Ro nasambit nga bodega hay himo sa concrete material kung siin idtu nakasueod ro mga kagamitan kapareho it generator, aircon, barina, kahoy ag maabu nga iba pa.
Ginapatihan nga posible sigon nga sa wiring sa ibabaw naghalin ro kaeayo.//
