KALIBO, Aklan—Namatay samtang ginabueong sa intensive care unit it sangka ospital ro sambilog sa daywang ka backrider nga sakay it motorsiklo nga naimbolbar sa aksidente nga nag-eontad sa Barangay Bagto sa banwa it Lezo ko Junyo 28.
Sa inisyal nga imbestigasyon it Lezo Municipal Police Station, ginkilaea ni P/Staff Sgt. Ryan Delgado, imbestigador it nasambit nga taeatapan ro namatay nga si Lensi Mae Zomil-Isuga, 20-anyos it Brgy. Kinalangay Viejo, Malinao samtang, una eon sa eowas nga kondisyon ro anang igmanghod nga si Lorie Mae Zomil-Isuga, 25-anyos ag ro live-in partner kara nga driver it motorsiklo nga si Frankie Ibardolasa, 28-anyos ag parehong residente it nasambit nga lugar.
Ginpahayag dugang nga naghalin ro motorsiklo sa Navitas, Numancia paadto it banwa it Malinao angkas ro daywang ka babaye kat nasunggaban it van maghalin sa banwa it Makato paadto sa bahin it Tigayon, Kalibo.
Nataeopangdan nga madasig ro pagmaneho it van driver rason nga nakaangkon it aksidente sa intersection nga bahin it karsada.
Bangud sa mabaskog nga impact it pagkasunggab it van sa motorsiklo hay inapok ro mga sakay kara nga gintunaan it andang pagkaangkon it mga lastro ag pagkamatay it sambilog kanda.
Sa dugang nga pagpangusisa it pulisya, uwa it suksok nga helmet ro mga backrider samtang, maswerte nga uwa man it naangkon nga lastro ro limang ka mga pasahero sakay it nasambit nga van.
Angot kara, kasong Reckless Imprudence Resulting to Multiple Injuries ro ginapangatubang makaron it van driver sa Lezo Municipal Police Station.
