Kalibo Aklan —–Ginpaidaeum sa full lockdown it Gobyerno it Oman ro sangka Distrito sa Muscat bilang kaparte it precautionary measures agud nga mabaeabagan ro mas pa nga pagkalhit it coronavirus disease (COVID-19).
Suno kay Bombo International Correspondent Wena Culaste, tubong Brgy. Polocate, Banga ag presenteng nagatrabaho sa Muscat, Oman nga ginsaraduhan anay ro tanan nga pasueod ag paguwa sa distrito it Mutrah sa Muscat bangud nga sambilog raya sa grabeng tinamaan it sakit sa nasambit nga nasyon.
Haeos daywang domingo eon sigon nga naka full lockdown ro lugar ag raya hay magapabilin hasta nga indi mabawi ro mandu.
Samtang, obligado ro tanan nga nagaguwa ag nagasueod sa Oman hay kinahangean nga mag-agi sa security checkpoints nga bantay sarado it mga pulis .
Apektado suno kana makaron ro mga pinoy nga naga-trabaho sa mga malls , kun sa siin, ginapatuman ro no work, no pay policy.
Sa mayad nga swerte hay ginabuligan ro mga raya it mga kababayan pinaagi sa pagtau kanda it mga pagkaon.
Naga-angkon eamang sigon sanda it komunikasyon sa kaparehong mga Pinoy pinaagi sa social media.
“Wait and see” man sigon sanda makaron kon pagataw-an it sweldo it andang mga employer bangud nga owa man sanda it trabaho .
Apang bastante sigon ro andang pagkaon .
Umpisa marso suno kana hay owa eon sanda ginapasugtan nga magguwa mag-eowas eamang kon kaibahan ro andang mga amo.
Sa makaron hay owa sanda nakasayod kon iga-extend ro lockdown nga matapos eon kunta sa Abril 22 nga nag-umpisa ko Abril 10, 2020 bangud sa padayun nga pagtaas it kaso it COVID-19 sa nasambit nga nasyon .
Gindugang pa kara nga instrikto man makaron kon nagapa-check-up sa mga clinic ag mga ospital.
