Kalibo Aklan —– Gineaygayan ni Dr. Rey Lebaquin ro tanan nga magtinir eon lang sa tagsa nanda ka panimaeay partikular kon uwa it importante nga ginapanaw sa guwa.
Raya hay matapos nga ginpaidaeom eon sa Enhanced Community Quarantine ro bilog nga probinsya it Aklan bilang tikang it gobyerno probinsyal kontra sa nagapadayon nga paeag it 2019 coronavirus disease ukon COVID-19 pandemic.
Suno kay Dr. Libaquin, ro COVID hay ginakonsidera nga virus rason nga inde eon raya madaea it antibiotic kundi prevention eamang ro nagakadapat nga himuon.
Ginakaeakipan raya it pagpabakuna, pabaskugon ro immune system ag likawan nga makahalubilo ro mga indibidwal nga ginadudahan nga may COVID.
Ginakabig suno kana nga miracle drug ro mga tinuean-on rason nga daya dapat sa makaron ro ginatinguhaan it tanan nga makakaon agud nga mapabaskog ro immune system bangud hasta sa makaron hay uwa pa it naimbento nga bueong para sa COVID.
Gineaygayan dugang ro tanan nga inde magpakoeba bangud kon nagapabilin ka eamang sa sueod it panimaeay hay inde ka matapnan it COVID apang dapat siguraduhon man nga samtang nagaduhong hay may bastante nga pagkaon ro bilog nga pamilya.
Sa pinakaulihing datos it Aklan Provincial Health Office, 28 eon ro nailistang Person Under Investigation (PUI’s) kon sa siin daywa kara ro nakaadmit gihapon sa Aklan Provincial Hospital ag kapin sa 4,333 ro nailistang Person Under Monitoring (PUM’s).
