KALIBO, Aklan—Magapangatubang sa kasong illegal possession of firearms ro sangka eaeaki matapos nga madakpan nga illegal nga nagahupot it baril sa Brgy. Venturanza, Banga.
Pinaagi sa bisa it Search Warrant hay madinaeag-eon nga narekober ro sangka 9mm pistol norinco sa mismong panimaeay it suspek nga si Roberto Rocio sa nasambit nga lugar.
Suno kay Lieutenant Colonel Bernard Ufano it Aklan Police Provincial Office (APPO) nga maabo eon nga reklamo ro andang nababaton angot sa gina-ubrang pagpamaeag ag pagpaeupok it baril it suspek sa andang barangay.
Haeos sang dag-on eon man sigon nga nag-expired ro lisensya it baril it suspek.
Iga-check man sigon it pulisya kung naga-match ro serial number it armas sa expired nga papeles ni Rocio.
Gin-engganyo man it opisyal ro publiko nga boluntaryong i-surrender ro andang ginapanag-iyahan nga baril eabi eon ro mga owa it ngakaigo nga dokumento para malikawan nga mapasakaan it kaso.
Samtang, hugot man nga ginpamalibaran ni Rocio ro alegasyon nga ginahaboy kontra kana.
Nagpanindugan man raya nga owa imaw it gina-ubrang maeain sa andang barangay.
Kapin sa waeong dag-on eon sigon kara nga ginapanag-iyahan ro baril ag kada dag-on nana raya nga gina-renew.
Apang, bangud sa presenteng sitwasyon sa COVID-19 pandemic rason nga owa eagi nana raya ma-proseso.
Nasayuran nga legal nga ginbakae it suspek ro baril apang owa eamang imaw naka-renew it lisensya.
Haum man sigon imaw nga atubangon ro kaso nga igapasaka kontra kana.
