Kalibo Aklan ——Arestado ro sangka eaeaki sa ginpatigayon nga drug buy-bust operation it gintingob nga pwersa it Kalibo PNP ag Provincial Drug Enforcement Unit (PDEU) Aklan sa Sitio Tugbungan, Brgy. Pook, Kalibo.
Ginkilaea ni P/Major Frenzy Andrade it PDEU Aklan ro suspek nga si Jonel Olager ag residente it Sto. Niño Village, Brgy. Poblacion, Kalibo.
Narekober sa posisyon ag kontrol it suspek ro sangka sachet it suspected shabu kabaylo it marked money nga P1,500 pesos.
Sa pagrekisa sa suspek hay narekober dugang ro sangka sachet it suspected illegal drugs.
Suno kay P/Major Andrade, ko buean pa it Enero gin-umpisahan nga ginmanmanan ro suspek apang makaron eamang imaw nadakpan.
Samtang sa pihak nga parte, emosyonal nga ginpahayag it anang magueang nga si Annie Antaran nga uwa ta naga-engaged sa illegal nga aktibidad ro anang manghod.
Nakibot eamang sigon sanda kat mabalitaan nga nadakpan ro anang manghod samtang nagapauli eon raya sa banwa it Kalibo.
Construction worker sigon ro anang igmanghod raya ro ginabuhi sa anang pamilya.
Samtang sa pihak nga parte, ginapatihan ni Liga ng mga Barangay President Ronald Marte nga ginhimo eamang nga meeting place ro andang barangay agud nga makapagtransaction it illegal nga aktibidad.
Nasayuran nga madueom ro nasambit nga lugar kon sa siin nadakpan ro suspek.
Suno pa kay kapitan Marte, maapply eon it pagiging drug free ro andang Barangay.
