KALIBO, Aklan—Arestado ro sangka eaeaki matapos nga sudlon kara ro sangka baraka bandang ala-2:40 kaina it aga-aga sa banwa it Kalibo.
Ginkilaea ro suspek nga si Jomari Tayco, residente it Barangay Dumga, Makato.
Naaresto imaw it pamilya Dempo ag ginturn-over sa Kalibo Municipal Police Station para sa nagakaigo nga disposisyon.
Sa panaysayon ni Catherine Dempo, 40 anyos, residente it Barangay Mobo, Kalibo ag tag-ana it nasambit nga baraka nga nabugtaw ro anang magueang matapos nga makabati it sangag sa sueod it anang baraka.
Sa andang pag-usisa, sangka eaeaki ro napan-uhan nanda nga nagdaeagan paguwa.
Mag-eowas kara, nakita man nanda ro sangka motorsiklo nga naka-park nga ginapatihan nga get-away vehicle it suspek rason nga andang ginbantayan.
Sa owa nagbuhay hay nagguwa ro eaeaki halin sa anang ginapanaguan ag nagpangayo it pasaylo sa pamilya.
Ginrason nana nga napilitan imaw nga magpanakaw bangud nga gina-alegar nga owa it mainom nga gatas ro anang daywang dag-on nga unga.
Owa it narekober nga anuman nga tinakawan nga bagay sa posisyon it suspek.
Nataeupangdan nga una sa impluwensiya it aeak si tayco kat maaresto.
Owa man it plano ro pamilya nga magpasaka it kaso.
Nasayuran nga nagbutang it trap ro pamilya sa baraka bangud nga tatlong beses eon raya nga ginsueod it mga owa nakilaea nga manakaw.
