KALIBO, Aklan—Arestado ro sangka 56-anyos nga drug suspect matapos maboe-an it limang sachet it ginadudahan nga shabu, granada ag tatlong baril nga kargado it bala sa ginpatigayon nga drug buy-bust operation it mga tawuhan it Provincial Drug Enforcement Unit (PDEU) ag Kalibo Municipal Police Station sa anang payag sa Barangay Mobo, Kalibo, agahon it Huwebes.
Bangud kara, posibleng magapangatubang sa patung-patong nga kaso ro suspek nga si Jerry Sim, may asawa ag residente it nasambit nga lugar.
Sa ginpatigayon nga paghaeughog it mga otoridad sa anang payag sa sueod it anang farm, nakit-an ro mga sachet it ginapatihan nga shabu, sangka granada ag tatlong short fire arms nga may mga bala.
Nakataeanang igapadaea sa laboratoryo ro nabo-oe nga “droga” para sa kumpirmasyon.
Sa pihak kara, ginpamalibaran it suspek nga imaw ro nagapanag-iya it mga narekober nga items.
Ko 2018 kat ginasugid nga ginkasuhan si Sim bangud sa pag-eabag sa RA 9165 ukon Comprehensive Dangerous Drugs Act of 2002.
Trabaho nana makaron ro pag-buy-and-sell it baka ag pagpananum sa anang farm.
Nauna eon nga ginkumpirma ni Mobo Barangay Captain Wendell Tayco nga kaibahan ro suspek sa nagpaidaeum sa community-based rehabilitation program it Department of the Interior and Local Government (DILG) sa andang lugar.
Samtang, ginpahayag ni P/Lt. Col. Ricky Bontogon, hepe it Kalibo Municipal Police Station nga mabuhay eon nga tiempo nga gina-monitor it mga otoridad ro suspek antes nga ginkasa ro operasyon.
