KALIBO, Aklan—Sangka eaeaki nga naggamit it pekeng 1,000 peso bill ro gin-eagas ag naaresto it mga awtoridad sa Brgy.Libertad , Nabas.
Ro nasambit nga suspek hay gina-alegar nga naggamit it pekeng kwarta sa pagbakae it tinapay sa sangka bakery Brgy. Unidos sa nasambit nga banwa.
Base sa report, matapos nga nagbakae it tinapay ro suspek nga nagabalor it 50 pesos hay ginsinsilyuhan imaw it 950 pesos it tindera.
Kat mataeupangdan nga peke ro kwarta, insigidang nagpangayo raya it bulig sa mga residente ag barangay tanod ag naeagas ro mga suspek sakay it motorsiklo.
Naabutan sanda sa nasambit nga lugar, apang nakapaeagiw ro sambilog nga kaibahan it suspek.
Posibleng magapangatubang ro suspek sa kasong pag-eabag sa Illegal Possession and use of False Treasury or Bank Notes and other Instruments of Credit.
Nagapatigayon eon man it follow up operation ro mga pulis.
