KALIBO, Aklan—Arestado ro sangka eaeaki bangud sa pag-angkon kara it bukon it lisensyadong baril sa sueod it andang baeay sa Sitio Kalintaan, Brgy. Daja Sur, Banga.
Nakilaea ro suspek nga si Jovanie Montuya, sa legal nga edad ag residente it nasambit nga lugar.
Sa gahum it sangka search warrant hay ginsalakay it gintingob nga pwersa it Banga Municipal Police Station ag Provincial Intelligence Unit it Aklan Police Provincial Office ukon APPO ro baeay ni Montuya.
Suno kay P/Capt. Jones Mendoza, OIC Chief of Police it Banga PNP nga antes nga ginkasa ro operasyon hay nagpatigayon anay sanda it surveillance sa lugar kasunod it mga reklamo nga imaw hay nagapinaeupok it baril.
Narekober halin sa suspek ro sangka kalibre .22 nga baril nga kargado it bala.
Nagapangatubang ro suspek sa reklamong pageabag sa Republic Act 10591 ukon Illegal Possession of Firearms and Ammunition.
Sa pihak nga parte, ginpamalibaran ni Montuya nga imaw ro nagapanag-iya it baril.
Suno kana nga nakita eamang nana ro armas samtang nga naga-arado sa eanas.
Mabuhay eon man sigon nana nga planong isurender sa mga otoridad ro baril, apang bangud sa kasako hay nakalipatan eon nana raya.
Owa man suno kana it kamatuoran ro pahayag it mga tawo sa andang palibot nga pirme imaw nga nagapinaeupok eabi eon kon mahilong.
Nagpahayag man imaw it kahauman nga atubangon ro kasong igapasaka kontra kana agud nga madepensahan ro anang kaugalingon.
