Kalibo Aklan ——Nag-angkon it kahalitan sa nagkaeain-eain nga parte it eawas ro sangka eaeaki matapos nga gin-eabo it mismong bayaw sa Brgy. Cortes, Balete.
Raya hay kasunod it naging komprontasyon it biktimang si Eldie Marcelino, 60-anyos sa bayaw karang si Elpedio Cuadrante, sa legal nga edad parehong residente it nasambitang lugar.
Base sa report, pasado alas 2:00 it hapon ko dominggo nga adlaw samtang nagabaktas sigon pauli ro biktima hay nagkita sanda daean ni Cuadrante.
Nasayuran nga pareho rayang una sa idaeom it makahieilong ilimnon.
Ginasugid nga nakaangkon it kumprontasyon sa tunga it magtimbang nga parte matapos ginsukot it biktima ro pitong bilog kara nga sako nga ginhueam sigon it anang bayaw.
Nagsabat man si Cuadrante nga owa raya it sako.
May kaangtanan kara, samtang nagatikang sigon si Marcelino, gulpi eamang imaw gin-akbayan it suspek ag gin-eabo.
Bangud kara, nag-angkon imaw it lastro sa anang waea nga porsyon it likod, dueonggan ag waea nga alima kung siin naputoe gid ro anang kumaing-king nga tudlo.
Mageuwas kara, nag-agum man si Marcelino it kahalitan sa anang likod ag paa matapos magsukoe it biktima.
Sa makarun hay padayun pang ginabueong sa Aklan Provincial Hospital si Marcelino para sa nagakaigo nga medikasyon.
