Kalibo Aklan——-Ginaimbestigahan eon makaron it pulisya ro natabo nga insidente it pagpang-eabo ag pagpamaril sa Brgy. San Isidro, Banga bandang alas-9:00 kabie.
Ginkilaea ni PSSgt. Danilo Dalida it Banga PNP ro biktima nga si Joselito Mallari, 58-anyos, residente it nasambit nga lugar samtang ro ginaturo nga mga suspek hay ginkilaeang sanday Allen Dela Cruz, 40-anyos, residente it Brgy. Linabuan Sur; Rowel Placido, sa legal nga edad, residente it Brgy. Mambog sa nasambit nga banwa ag Jimboy Placido, 23-anyos, tumandok it Culasi, Antique.
Suno kay PSSgt. Dalida, nakaangkon it lastro sa ueo ag alima tuga it pag-eabo ro biktima ag naabutan it mga raya ro si Dela Cruz nga naga-eobog sa prente it biktima ag may lastro man sa ueo, waea nga uyahon ag may tama it baril sa abaga.
Sa inisyal nga imbestigasyon it pulisya, samtang ro biktima una sa andang panimaeay kaibahan ro anang bilog nga pamilya kat gulpi eamang nataeopangdan nga may naga-flashlight sa guwa ag dikara nakit-an nga nagapaeapit si Dela Cruz ag may buyot nga siyaw ag una sa impluwensya it aeak.
Nakaangkon sigon it diskusyon sa magtimbang nga parte kon sa siin ginsundan raya it daywang ka mga suspek.
Nauna eon sigon nga may banggianay sa tunga it mga raya hasta nga natabo ro insidente.
Ginsalakay it tatlo nga armado it boga ag sanduko ro panimaeay it biktima.
Sa makaron si Mallari hay naka-confine sa Aklan provincial hospital para sa nagakaigong pagbueong samtang si Dela Cruz hay naka-hospital arrest man ag si Rowel Placido hay nagapabilin nga atlarge.
