KALIBO, Aklan—Dead on arrival sa sangka pribadong hospital ro sangka eaeaki matapos nga inatake it anang masakit sa Sitio Cagban, Brgy. Manoc-Manoc sa isla it Boracay bandang alas-12:30 kaina it aga-aga.
Ginkilaea ni PSSgt. Salibio it Boracay PNP ro biktima nga si Boyet Daylisan, sa legal nga edad ag residente it San Jose, Romblon.
Ginapatihan nga inatake sa sakit nga asthma ro biktima bangud nga antes pa man natabo ro insidente hay nagreklamo eon raya sa anang kaibahan nga masakit ro anang tiyan samtang naga-ayos it pumpboat nga para kunta sa island hopping.
Bangud kara, gin-alalayan imaw it anang kaibahan hasta nga gin-aywanan it makadali apang sa anang pagbalik makataliwan ro pilang minuto hay nasapwan eon lang raya nga nagahamyangon rason nga insigida man nga gindaea sa ospital para sa nagakaigong pagbueong.
Apang, uwa eon naeowas ro kabuhi it biktima ag gindeklarang patay eon it nagtatap nga doktor.
