KALIBO, Aklan—Gin-insister ni alyas Dodong nga indi nana pagdaeaganan ro gin-utang nga 10,000 pesos ag interest nga masobra sa 3,000 pesos sa sangka Overseas Filipino Worker ukon OFW sa Kuwait nga tumandok it Davao.
Suno kana nga nakataeana eon kunta imaw nga magabayad sa gintaeana nga tiempo kay certain Ann Audrey, apang naging isyu ro pagpakahuya kana sa social media ag gindaeahig pa ro anang asawa ag unga.
Ro ana sigon nga pamaagi it pagsukot sa social media hay may kaibahan nga pagpamaeabag.
Ko ulihi, ginsuhestiyon ni alyas Dodong nga makaangkon sanda it settlement nga magatau imaw it initial payment nga 6,000 pesos sa Lunes ag pataasan it 5,000 pesos ro interest.
Ro nabilin nga balanse suno kana hay pagabayaran it installment nga 1,000 pesos kada domingo.
Ginpasiguro pa nana nga magiging saksi ro bombo radyo kalibo sa pagbayad it anang utang.
Ginhinyu man nana nga i-delete eon ro mga ginpang-post nga mga pagpanamad kontra kana.
Sa pihak kara, nagpaandam si alyas dodong nga posibleng magapasaka man imaw it kaso bangud sa paninirang puri.
Sa pihak nga parte, nagpasugot ro OFW nga si Anne Audrey sa kundisyon ni alyas Dodong.
Kadungan kara, nagpangayo imaw it pasaylo sa mga masakit nga tinaga nga anang ginbuhian bangud nga nadaea eamang sigon imaw sa anang emosyon.
Makaueugot suno kana nga pirmeng ginapromisahan nga pagabayaran ag owa man ginatuman.
Ro insidente suno kana hay nagtuga it stress kana nga naka-apekto sa anang trabaho.
