KALIBO, Aklan—Nagapabilin makaron nga naka-hospital arrest si Jury Batoy matapos nga ginbaril-patay ro anang biyanan bandang ala-1:35 kahapon sa Brgy. Monlaque, Ibajay.
Suno kay Mylene Pines, live in partner it suspek nga antes ro insidente hay nakaangkon it owa pagka-ilintindihan ro magtimbang nga parte matapos nga gahiton sigon it biktima nga si Orlando Pines, 70-anyos ro andang kurae ag tanom nga hamtak.
Ginpakamayad sigon nanda nga magdangop sa barangay para maistoryahan ro problema.
Ginasugid nga nauna nga nag-uli ro anang ama kung siin ginsundan imaw it suspek.
Makataliwan sigon ro pilang minuto hay nakibot eon lang sanda kat makabati it pilang beses nga eupok it baril.
Ginapatihan nga nakaangkon it diskusyon ro daywa kung siin ginbaril it biktima sa baba ro suspek.
Nahimo pa sigon nga magbaeos it suspek kung siin ginbaril kara sa dughan ro biktima nga gintunaan it anang hinali nga kamatayon.
Nasayuran nga may dati eon nga owa pagka-ilintindihan ro pamilya it magtimbang nga parte bangud sa eugta nga ginbakae it biktima kaibahan ro ama it suspek.
Samtang, owa pa sigon sanda naka-istorya it anang ina angot sa magiging disposisyon matapos ro insidente.
