(Update) KALIBO, Aklan—Owa eon it kabuhi kat masapwan ro sangka eaeaki samtang nakasab-eay ag nagaeutaw-eutaw sa baybayon maeapit sa bakhawan nga sakop it Brgy. New Buswang, Kalibo.
Suno kay Lino Malakas, Brgy. tanod it Pook, Kalibo nga nakita kara ro patay nga eawas it owa pa makilaeang persona bandang alas-7:00 kainang agahon samtang nagapangisda maeapit sa lugar.
Ro biktima hay nakasuksok it sweater, kulay berde nga short ag ginabuebanta nga naga-edad it 40 anyos pataas kamana man nga kasarangan eamang ro kataason.
Posible sigon nga maghalin raya sa ibang lugar bangud owa man it napabalita nga missing person sa andang barangay.
Ginpakamayad sigon nana nga magtawag sa sambilog sa andang konsehan para ipahisayod ro hitabo kung siin insigida sanda nga nagtawag sa MDRRMO.
Sa pihak ga parte, mabahoe ro pagpati it mangingisda nga si Roberto Jestada nga ginhungod nga ihueog sa tubi ro biktima.
Raya hay matapos imaw nga makita nga nakasab-it sa lambat ag may nakitang pamato sa anang kilid.
Posible sigon nga ginbutangan raya it pamato agud nga indi mag-eutaw.
