KALIBO, Aklan—Owa eon it kabuhi kat masapwan ro sangka persona pasado alas-6:30 kahapon sa Brgy. Cabangahan, Madalag.
Nakilaea ro biktima nga si Noel Nadate, 56-anyos, residente it nasambit nga lugar.
Suno kay Police Master Sergeant Rufino Donato, imbestigador it Madalag Municipal Police Station, nakabaton sanda it tawag halin sa kapitan it barangay bandang alas-8:07 kahapon it agahon kung siin insigida sanda nga nagresponde sa lugar.
Una eon sigon sa state of decomposition ro bangkay kat anda raya nga masapwan kamana man nga naka-underwear eamang ag puno it eutay.
Base sa pagpangusisa it mga otoridad, ulihing nakita nga buhi ro biktima pasado alas-9:00 it agahon ko Disyembre 31, 2021.
Naga-isaeahanon eamang sigon nga naga-istar sa andang baeay ro biktima kung siin may kaeayuon man ro mga kaeapit nga baeay ag karsada.
Kaibahan it Madalag PNP ro mga katapo it Scene of the Crime Operatives (SOCO) nga nag-imbestiga sa lugar.
Nakataeana nga ipaidaeom sa autopsy ro bangkay matapos nga magpasugot ro pamilya para matumod ro naging rason it anang kamatayon.
Samtang, nagapadayun man ro imbestigasyon it mga otoridad angot sa insidente.
