Namatay samtang ginabueong sa sangka pribadong ospital ro sangka 42-anyos nga eaeaki matapos nga ginaalegar nga nagbaril sa anang kaugalingon sa Brgy. Camanci Norte, Numancia.
Ginkilaea ro biktima nga si Edmund Lachica, tumandok it Brgy. Tigayon, Kalibo apang presenteng naga-istar sa nasambit nga lugar.
Sa exclusive interview it Bombo Radyo, ginpahayag ni Nelia Mamay, dating panugangan it biktima nga nabatian nanda nga ginpawild nana ro anang motor hasta nga ko ulihi hay nakabati sanda it eopok.
Kasunod kara ro pagpangayo it tabang it 19 anyos nga babaye nga kaibahan ni Lachica sa sueod it baeay kon sa siin insigida sanda nga nagtawag sa taeatapan it pulisya.
Naging emosyonal man si Mamay bangud nga mabuot kanda ro eaeaki kon sa siin nagapabilin ro respeto bilang ginikanan it anang dating live-in partner.
May ginasugid sigon ro biktima nga kaaway nana apang uwa sanda kasayod kon sin-o gidman ro anang nakaalitan.
Si Lachica hay nakitaan it tama it baril sa ueo nga gintunaan it anang ginali nga kamatayon.
Samtang sa pihak nga parte, ginpahayag ni PSSgt. Marlon Del Rosario it Numancia Municipal Police Station nga nagapadayon ro andang imbestigasyon angot sa nasambit nga insidente kon sa siin nagpatigayon sanda it paraffin test sa biktima mismo ag sa anang kaibahan nga 19 anyos nga babaye.
Mag-eowas kara, igapaidaeom man sa autopsy examination ro bangkay ni Lachica agud nga masayuran ro gintunaan it anang kamatayon.
Narekober sa lugar ro kalibre 38 revolver nga posibleng ginamit sa ginaalegar nga pagpakamatay it biktima
