Bangud sa gina-alegar nga may nervous breakdown, sangka eaeaki ro nag-eumpat sa may bahin it Mindoro area samtang sakay it Starlite Ferry nga biyaheng Caticlan Jetty Port ko nagtaliwan nga Sabado, Abril 8, 2023 bandang alas-5 it hapon.
Ginkilaea ro biktima kay Rosario Java Penaso, 55-anyos ag residente it Quezon City.
Ginpahayag ni Senior Petty Officer Dominador Salvino it PCG-Aklan nga nakabaton sanda it tawag angot sa sangka persona nga nag-eumpat sa kaeawran nga sakop it Mindoro ag insigidang ginrespondehan ro nasambit nga insidente.
Bangud kara gilayon nga narescue ro biktima ag ginturn-over sa PCG Caticlan para mataw-an it nagakaigong pagbueong ag evaluation.
Nasayuran nga owa it kaibahan si Penaso ag ginapanaysayon nga maga-adto sigon raya sa Cagayan De Oro.
Indi sigon raya masyado nga maeubtan bangud sa nagkasari-sari nga mga panabaton.
Sa makaron sa kustodiya it MSWD- Malay si Penaso ag ginaproseso eon ro pagbalik kara sa kaugalingon nga pamilya.
Sa pihak nga parte, sandig sa inisyal nga assestment it PCG-Aklan , naging matawhay ro pagbuhos it mga bisita ag dumueoong turista sa Isla it Boracay kasunod it maeawig nga bakasyon bangud sa Semana Santa.
Raya hay matapos nga owa sanda it nailistang untoward incident maghalin sa andang area of responsibility.
Angot kara, apisar nga kaabuan sa mga bisita hay naga ueulian eon sa andang mga lugar nagapabilin nga naka heigtened alert ro bilog nga pwersa it PCG hasta makaron nga adlaw it Lunes.
Sa kamatuoran sigon hay nagdugang sanda it augmentation sa lugar bilang sangka priority port makaron nga tiempo.
