KALIBO, Aklan–Arestado ro sangka eaeaki matapos nga nagpaeagiw sa checkpoint it pulisya sa Barangay Venturanza, Banga, Lunes it gabi-e, Abril 29.
Nakilaea ro suspek kay Delsol Zonio Jr., tubong Polo, Banga, apang naga-istar sa Silay City Negros Occidental matapos nga makapangasawa sa nasambit nga lugar.
Suno kay P/Capt. Benny Jones Mendoza, hepe it Banga Municipal Police Station nga ginparahan it anang mga tawuhan ro suspek nga sakay it kotse nga kulay puea.
Apang matapos nga magpundo ag ginpapanaog ro anang bintana, ginpaharurot kara it daeagan ro anang saeakyan rason nga gin-eagas it mga operatiba kun sa siin ginasugid nga sangkiri pa kara nga nabungguan ro daywang pulis nga sa mayad nga swerte hay nakalikaw.
Napas-eawan sigon ro Banga PNP nga maeagas ro suspek hasta sa barangay lapnag, banga rason nga gintimbre nanda ro insidente sa Madalag PNP.
Naispatan ro kotse sa tago nga lugar sa Barangay Balactasan, Madalag maeapit sa ginadayo makaron nga Macapio River.
Sa pag-usisa sa anang bag, nakita idtu ro mga drug paraphernalia ag kwartang papel nga nagabalor it P23,500 ag mga coins nga kapin sa P31.
Nadiskubre pa ro nagkaeain-eain nga mga IDs nga nakapangaean kana kaibahan ro ID it J&T express nga kan-o guid eamang sangka empleyado ro ginhold-up ag ginbaril patay sa guwa mismo it andang opisina maeapit sa andang service truck.
Dugang pa ni P/Capt. Mendoza nga antes nga mahaeughog ro sueod it anang kotse hay kinahangean pa nga makabo-oe it search warrant .
Ginpasakaan it Banga PNP it reklamong reckless driving ag resistance and disobedience to a person in authority kasunod it nahimo nga traffic violation.
Dugang pa nga igapaidaeum si zonio sa drug test matapos nga mataeupangdan nga matsa owa raya sa anang kaugalingon ag bangud sa mga narekober nga drug paraphernalias.
