KALIBO, Aklan—Nagapabilin nga naka confine sa Aklan Provincial Hospital ro sangka eaeaki matapos nga ginbinaril it makapilang beses it owa pa nakilaea nga suspek sa mismo nana nga panimaeay pasado alas-2 kaina it aga-aga sa Sitio Cabcaban, Brgy. Calizo, Balete.
Ro biktima hay nakilaea kay Robert Dela Cruz, 35 anyos, sangka laborer ag residente it nasambit nga lugar.
Base sa report, antes nga natabu ro shooting incident hay nakipag-inuman pa kahapon it hapon ro biktima sa anag amigo nga si Joem Cuarentas kaibahan ro daywang iba pa, apang ko ulihi hay nagsaylo sa andang baeay.
Suno kay Cuarentas nga bandang alas-6 it gabi-i hay nag uli eon sanda ag naaywan nga naga-isaeahanon si Dela Cruz sa anang baeay.
Nakibot eon lang sigon sanda matapos nga mabalitaan nga ginbaril ro anang amigo.
Sa pihak nga parte, ginpahayag ni P/Major Bryan Alamo, hepe it Balete Municipal Police Station nga nagapadayun ro andang imbestigasyon sa insidente kamana man ro pagtumod sa responsabli sa krimen.
Apang may ginasundan eon sanda nga anggulo kon ano ro posibleng rason it insidente.
Maskin sigon ro biktima hay indi man maka-identify kon sin-o ro nagbaril kana it maeapitan.
Natigayon nga madaea si Dela Cruz sa ospital matapos nga mataeupangdan it anang kaeapitbaeay ro pagpangayo nana it bulig.
Maga-deliver kunta it inugbaligya nga tinuea ro kaeapitbaeay, apang pag-agi nana sa lugar hay nabatian kara ro pagpangayo it bulig it biktima.
Nasayuran nga ro biktima hay may dating kasong robbery ag bag-o eamang nga nakahilway sa presuhan.
