KALIBO, Aklan—Nakabaton it tawag ro Libacao Municipal Police Station halin sa Brgy. Captain it Brgy. Dalagsaan sa nasambitan nga banwa nga nagareport parte sa biktima it pagpamaril.
Pahayag ni P/Lt. Ronald Macario, Deputy Chief of Police it Libacao Municipal Police Station nga ro biktima hay nag’adto sa anang farm kun siin naabutan nana ro suspek nga una sa ibabaw it puno it mangga ukon ginsaka ro andang mangga.
Ginkompronta sigon it biktima ro suspek kun siin nga insigida sigon nga nagpanaog raya ag uwa it anuman nga rason hay ginbaril ro biktima gamit ro anang homemade shotgun.
Nag’agom it igo sa waea nga abaga ro 45-anyos nga biktima ag taga’Sitio Taban it nasambitan nga barangay samtang ro suspek hay 20-anyos nga residente it kapareho man nga barangay ag gumankon man it biktima.
Suno pa kay P/Lt. Macario nga sa makaron hay iya sa provincial hospital ro biktima para sa nagakaigo nga atensyon medikal.
Dugang pa nana nga ginahueat pa it mga otoridad ro desisyon it pamilya ku biktima.
Samtang , nakapaeagyo man ro suspek matapos himuon ro krimen paadto sa nabukid nga parte it lugar.
Sa makaron, magasueod ro nasambitan nga kaso sa regular filing ag pagakasuhan it frustrated homicide ro suspek kun madakpan.
