KALIBO, Aklan—Bangud sa simpleng away sa baeas, ginbaril it sangka eaeaki ro anang naka-diskasan nga kaeapitbaeay pasado alas-9:00 kaina it agahon sa Purok 13, C. Laserna St., Barangay Poblacion, Kalibo.
Base sa report, nakaangkon sigon it mainitan nga diskusyon ro biktimang si Reynante Mongaya, 52-anyos, sangka photographer ag ro suspek nga si Juvy Igma, parehong residente it nasambit nga lugar.
Ginasugid nga ginsita it suspek ro biktima matapos nga gintumpukan kara it baeas ro dating ginabutangan it anang tinipon nga baeas maeapit sa Aklan river.
Natabu ro insidente maeapit sa tangke sa kilid it baeay it biktima.
Gina-alegar nga gin-ayat raya it suspek daea ro indi pa matumod nga kalibre it baril ag ginpaeukpan it sang beses nga tinamaan sa tuo nga parte it anang tiyan.
Insigida raya nga gindaea sa sangka pribadong ospital nga padayun nga gina-obserbahan sa intensive care unit ukon ICU.
Ginhana pa raya nga paeukpan it uman, apang nakadaeagan ro biktima.
Madasig man nga nagpaeagiw ro suspek matapos nga mataw-an it katumanan ro anang pagbaril sa biktima apang naaresto sa banwa it Malinao.
Ginpahayag dugang nga dati eon nga may record sa barangay ro daywa matapos man nga magkainitan sa diskusyon, may tatlong buean pa eamang ro nagtaliwan, apang nagkaayos
Angot kara, nauna eon nga nag-apela si JM Mongaya, unga it biktima sa suspek nga magsurender ag atubangon ro kaso nga igapasaka kontra kana nga ko ulihi hay madinaeag-on man raya nga naaresto it pulisya.
