KALIBO, Aklan—Padayun nga ginabueong sa Aklan provincial hospital ro sangka eaeaki matapos nga bun-on it anang kasimaryo sa sangka namatyan, Miyerkules it udtro adlaw sa Brgy. Jumarap, Banga.
Nakilaea ro biktima nga nag-angkon it sangka igo it pagbuno sa anang tiyan nga si Darryl Flores samtang ro suspek nga naaresto it mga awtoridad sa andang baeay hay si Roland Zapico, parehong sa legal nga edad ag residente it nasambit nga lugar.
Natabu ro insidente it pagpangbuno sa sangka lamay sa nasambit nga lugar.
Suno kay Manilyn Rentino, witness sa krimen nga antes ro pagpangbuno hay masadya pa sanda nga naga-istorya nga tatlo sa sangka lamesa angot sa trabaho it pagiging bouncer.
Apang ko ulihi hay nagresulta raya sa pagsueunlugan nga posibleng ginka-pikon it suspek.
Gulpi eamang sigon nga ginbayo it suspek ro biktima hasta nga nagbo-oe raya it kutsilyo ag ginbuno si Flores.
Sa mayad nga swerte suno kana ag medyu insigidang nahimasmasan ro suspek ag owa eon nana nga ginpangaywahan ro pagbuno.
Matapos ro insidente hay gin-uli ro suspek sa andang baeay kun sa siin idtu eon raya naaresto it mga rumespondeng katapo it Banga Municipal Police Station.
Ginasugid nga owa man it dating bagina ro magtimbang nga parte.
