KALIBO, Aklan–Ninahan nga gindaea sa Aklan provincial hospital ro sangka eaeaki matapos nga ginbuno it anang kasimaryo sa Brgy. Libas, Banga.
Ginkilaea it Banga PNP ro biktima nga si Jerry Naig, 50-anyos kon sa siin nakaangkon it lastro sa dughan, tiyan ag waea nga kili-kili matapos nga ginbuno it ginatumod nga suspek nga si Condrado Salon, 51-anyos ag parehong residente it nasambit nga lugar.
Base sa inisyal nga imbestigasyon it pulisya, magaadto kunta sa anang igmanghod si Naig apang nagsub-eang sanda ni Salon kon sa siin pareho ro mga raya nga una sa idaeom ko impluwensya it aeak rason nga may nagpatunga nga diskusyon sa magtimbang nga parte.
May kaangtanan kara, nabaywan sa dahi ni Naig si Salon rason nga nag-uli raya sa anda ag nakabueo it kutsilyo.
Sa anang pagbalik sa lugar hay uman sanda nga nagsub-eang ag uman nga may nagpatunga nga diskusyon sa magtimbang nga parte hasta nga nabun-an it suspek ro biktima.
Si Salon hay insigida man nga naaresto it mga otoridad ag gindaea sa Banga police station kon sa siin imaw sa makaron nakakustudiya para sa nagakaigong disposisyon.
Samtang, si Naig hay nagapabilin pang naka-confine sa nasambit nga ospital para sa nagakaigong pagbueong.
